കവിയും ചലച്ചിത്ര ഗാനരചയിതാവുമായ എസ്.രമേശന് നായര് (73) അന്തരിച്ചു. കൊച്ചിയിലെ സ്വകാര്യ ആശുപത്രിയിൽ ചികിത്സയിലായിരുന്നു. ക്യാൻസർ ബാധിതനായിരുന്ന അദ്ദേഹത്തിന് കോവിഡും സ്ഥിരീകരിച്ചിരുന്നു . ഭക്തിഗാനങ്ങള് ഉള്പ്പെടെ 500 ലധികം ഗാനങ്ങള് അദ്ദേഹം രചിച്ചിട്ടുണ്ട്. . ഗുരുപൗർണമി എന്ന കാവ്യ സമാഹാരത്തിനു 2018ലെ കേന്ദ്ര സാഹിത്യ അക്കാദമി പുരസ്കാരം ലഭിച്ചിട്ടുണ്ട്. 2010-ലെ കേരളസാഹിത്യ അക്കാദമിയുടെ സമഗ്രസംഭാവനയ്ക്കുള്ള പുരസ്കാരവും ലഭിച്ചിരുന്നു. ആറാം വെണ്ണിക്കുളം സ്മാരക പുരസ്കാരവും ആശാൻ പുരസ്കാരവും ലഭിച്ചിട്ടുണ്ട്.
1948 മേയ് 3ന് കന്യാകുമാരി ജില്ലയിലെ കുമാരപുരത്തായിരുന്നു ജനനം. പരേതരായ ഷഡാനനന് തമ്പിയും പാര്വതിയമ്മയുമാണ് മാതാപിതാക്കള്. കേരള ഭാഷാ ഇന്സ്റ്റിറ്റ്യൂട്ടില് സബ് എഡിറ്ററായും ആകാശവാണിയില് നിര്മാതാവായും രമേശന് നായര് പ്രവര്ത്തിച്ചിരുന്നു. തൃശൂര് വിവേകോദയം സ്കൂള് റിട്ട. അധ്യാപികയും എഴുത്തുകാരിയുമായ പി.രമയാണ് ഭാര്യ. ഏക മകന് മനു രമേശന് സംഗീത സംവിധായകനാണ്.
1985-ല് പുറത്തിറങ്ങിയ പത്താമുദയം എന്ന സിനിമയിലെ ഗാനങ്ങള് രചിച്ചുകൊണ്ടാണ് മലയാളചലച്ചിത്ര രംഗത്തേക്കുള്ള രമേശന് നായരുടെ പ്രവേശനം. പിന്നീട് നിരവധി സിനിമകള്ക്ക് ഗാനങ്ങളൊരുക്കി. തിരുക്കുറല്, ചിലപ്പതികാരം എന്നിവയുടെ മലയാള വിവര്ത്തനവും നിര്വഹിച്ചിട്ടുണ്ട്. ഗുരു, അനിയത്തിപ്രാവ്, മയില്പ്പീലിക്കാവ്, പഞ്ചാബിഹൗസ് തുടങ്ങി നിരവധി ചിത്രങ്ങള്ക്ക് ഗാനരചന നിര്വഹിച്ചിട്ടുണ്ട്.