പ്രവാസ ജീവിതം അവസാനിപ്പിച്ചുള്ള യാത്രയിലായിരുന്നു കോഴിക്കോട് മുക്കം സ്വദേശി സാഹിറാ ബാനു.മൂന്ന് മക്കളും ഒപ്പമുണ്ടായിരുന്നു. സര്‍ക്കാര്‍ ജോലിയെന്ന വലിയ സ്വപ്‌നത്തിലേക്കായിരുന്നു യാത്ര. ആ സ്വപ്‌നങ്ങളും രണ്ട് മക്കളെയും തനിച്ചാക്കി സാഹിറയും ഇളയ കുഞ്ഞും ഇന്നലെ കരിപ്പൂരിലെ വിമാനാപകടത്തില്‍ യാത്രയായി.
പത്ത് മാസം മുമ്പാണ് സാഹിറയും മക്കളും ദുബൈയിലെത്തിയത്. സര്‍ക്കാര്‍ ജോലി ലക്ഷ്യമിട്ട് നാട്ടിലേക്ക് മടങ്ങുകയായിരുന്നു. ഇളയ മകന്‍ അസം മുഹമ്മദും അപകടത്തില്‍ മരിച്ചു.
പരിക്കേറ്റ മക്കള്‍ രണ്ട് പേരും സ്വകാര്യ ആശുപത്രികളില്‍ ചികിത്സയിലാണ്. ഇവരുടെ പരിക്കുകള്‍ സാരമുള്ളതല്ലെന്ന് ആശുപത്രി അധികൃതര്‍ അറിയിച്ചതായി സാഹിറയുടെ ബന്ധു ദ ക്യുവിനോട് പറഞ്ഞു.
മുക്കം കക്കാട് മഞ്ജറ മുഹമ്മദലി മാസ്റ്ററുടെ മകളാണ് സാഹിറ ബാനു.ഇളയ കുഞ്ഞിന്റെ പ്രസവത്തിനായി സാഹിറയുടെ അടുത്തെത്തിയ ഉമ്മ കുറച്ച് നാളുകള്‍ക്ക് മുമ്പാണ് നാട്ടിലേക്ക് മടങ്ങിയെത്തിയത്. സാഹിറയുടെ ഭര്‍ത്താവ് ദുബൈയില്‍ അകൗണ്ടന്റാണ്.
