'വാനപ്രസ്ഥം' എന്ന ചിത്രത്തിന്റെ ഓർമ്മകൾ പങ്കുവച്ച് തിരക്കഥാകൃത്ത് രഘുനാഥ് പലേരി. 1999 ൽ ഷാജി എൻ‌ കരുണിന്റെ സംവിധാനത്തിൽ മോഹൻലാൽ സുഹാസിനി തുടങ്ങിയവർ കേന്ദ്രകഥാപാത്രങ്ങളെ അവതരിപ്പിച്ച ചിത്രമായിരുന്നു വാനപ്രസ്ഥം. ചിത്രത്തിൽ കുഞ്ഞിക്കുട്ടൻ എന്ന കഥകളി ആർട്ടിസ്റ്റായാണ് മോഹൻലാൽ എത്തിയത്. ചിത്രത്തിലെ മോഹൻലാലിന്റെ കഥാപാത്രത്തിന് ആ വർഷത്തെ മികച്ച അഭിനേതാവിനുള്ള ദേശീയ സംസ്ഥാന പുരകസ്കാരങ്ങളും അദ്ദേഹത്തിന് ലഭിച്ചിരുന്നു. ചിത്രത്തിലെ കുഞ്ഞിക്കുട്ടന് വേണ്ടി എട്ട് മണിക്കൂറോളം കഥകളി വേഷം കെട്ടി കിരീടവും ചൂടി മോഹൻലാൽ സെറ്റിലിരുന്നത് താൻ കണ്ടിട്ടുണ്ടെന്ന് രഘുനാഥ് പലേരി പറയുന്നു. വാനപ്രസ്ഥം എന്ന ചിത്രത്തിന്റെ ഒരു ഭാ​ഗമാകാൻ കഴിഞ്ഞത് ഭാ​ഗ്യം തന്നെയാണെന്നും ക്യു സ്റ്റുഡിയോയ്ക്ക് നൽകിയ അഭിമുഖത്തിൽ രഘുനാഥ് പലേരി പറഞ്ഞു.

രഘുനാഥ് പലേരി പറഞ്ഞത്:

വാനപ്രസ്ഥത്തിന്റെ ചില ഷൂട്ടിം​ഗ് സയമത്ത് ഒക്കെ ഞാൻ അവിടെയുണ്ടായിരുന്നു. എഴുതിക്കൊടുത്ത സീനിനെ അതിനും മുകളിലേക്ക് ഉയർത്തുന്നത് ഒന്ന് ലാലിന്റെ അഭിനയമാണ്. രണ്ട് അതിന്റെ ഫോട്ടോ​ഗ്രഫി പിന്നൊന്ന് ആ ​ഗുരുവിന്റെ മുഖഭാവങ്ങളാണ് അതിനെക്കാളുപരി ഇത് എടുക്കുന്ന ആളായ ഷാജി എൻ കരുണിന്റെ സിനിമ സങ്കൽപ്പം. ഇതെല്ലാം ആ സിനിമയെ ഉയർത്തിയ കാര്യങ്ങളാണ്. ലാലിന്റെ അതിമനോഹരമായ പെർഫോമൻസായിരുന്നു അത്. പിന്നെ സിനിമയായി വരുമ്പോൾ അതിൽ വരുന്ന സം​ഗീതം. സാക്കീർ ഹുസൈന്റെ അസാധ്യമായ വേദന തരുന്ന ഒരു മെലഡിയുണ്ട് അവിടെ. തിരുവനന്തപുരത്തെ ഒരു മാളികയിൽ വച്ചിട്ടാണ് ആ സിനിമയുടെ വലിയൊരു ഭാ​ഗവും ഷൂട്ട് ചെയ്തത്. അവിടെ കിരീടം വച്ച് എട്ട് മണിക്കൂറോളം വേഷം കെട്ടി ലാൽ ഇരുന്നതൊക്കെ അടുത്തു പോയി ഇരുന്ന് ഞാൻ കണ്ടിട്ടുണ്ട്. അതൊരു വലിയ സിനിമയായിരുന്നു വാസ്തവത്തിൽ. എഴുതി കഴിഞ്ഞു കഴിഞ്ഞാൽ‌ വലിയൊരു ആശ്വാസമുണ്ടാകും നമ്മളിൽ. പിന്നെ ആ സിനിമയുടെ ഭാ​ഗമാകാൻ സാധിച്ചു എന്നത് ഒരു ഭാ​ഗ്യമാണ്. കുഞ്ഞിക്കുട്ടന്റെ കഥാപാത്രത്തെക്കുറിച്ച് എല്ലാം എനിക്ക് പറഞ്ഞ് തന്നതും ഷാജിയാണ്. ആ കഥാപാത്രത്തെ കൺസീവ് ചെയ്തത് ഷാജിയായിരുന്നു. സീൻ ഉണ്ടാക്കി എഴുതിയത് ഞാനാണ്. ആശയം മറ്റൊരാൾ തന്നു എന്നതുകൊണ്ട് അതിന്റെ ലാഘവത്തം കുറയുന്നില്ല. അതിനെ ഒരു രൂപത്തിലേക്ക് മാറ്റുക എന്നത് വലിയൊരു പ്രോസ്സസാണ്.