ഐ നോബഡി എന്ന പുതിയ ചിത്രത്തെക്കുറിച്ച് സംസാരിച്ച് നടൻ പൃഥ്വിരാജ്. പ്രേക്ഷകർ പ്രതീക്ഷിക്കുന്നതിനപ്പുറം വലിയ ചിത്രമായിരിക്കും ഇത്. ടീസറിലോ ട്രെയ്ലറിലോ ഈ സിനിമയുടെ സ്കെയിൽ എന്തെന്നാൽ സംബന്ധിച്ച് സൂചനകൾ നൽകിയിട്ടില്ല. എന്നാൽ അതിനപ്പുറവും ചില കാര്യങ്ങൾ സിനിമയിലുണ്ടാകുമെന്ന് പൃഥ്വിരാജ് പറഞ്ഞു. ക്യു സ്റ്റുഡിയോ അഭിമുഖത്തിൽ സംസാരിക്കുകയായിരുന്നു പൃഥ്വിരാജ്.
ഐ നോബഡി ഭയങ്കര എന്റർടെയ്നിങ്ങായ, എൻഗേജിങ്ങായ, നിങ്ങൾ പ്രതീക്ഷിക്കുത്തിനുമപ്പുറം കുറെ പരിപാടികളുള്ള, നിങ്ങൾ വിചാരിക്കുന്നതിനേക്കാൾ വലിയൊരു സിനിമയായിരിക്കും. ഇതിന്റെ ക്യാൻവാസ് ടീസറിലും ട്രെയ്ലറിലും വ്യക്തമാക്കിയിട്ടില്ല. ആ സിനിമയുടെ രീതി അങ്ങനെയാണ്. സിനിമ കണ്ടു കണ്ടു... വിഷയം വലുതാകുമ്പോഴാണ് ആ സിനിമയും വലുതാകുന്നത്,' പൃഥ്വിരാജ് പറഞ്ഞു.
അതേസമയം ഐ നോബഡി ജൂലൈ 9 ന് തിയറ്ററുകളിൽ റിലീസ് ചെയ്യും. നിസാം ബഷീർ ഒരുക്കുന്ന ചിത്രത്തിൽ പാർവതി തിരുവോത്തും പ്രധാന വേഷത്തിലെത്തുന്നുണ്ട്. എന്ന് നിന്റെ മൊയ്തീൻ, കൂടെ തുടങ്ങിയ സൂപ്പർഹിറ്റുകൾക്ക് ശേഷം പാർവതിയും പൃഥ്വിരാജും വീണ്ടും ഒന്നിക്കുന്ന ചിത്രമാണിത്. ഇ 4 എന്റർടൈൻമെന്‍റ്സ്, പൃഥ്വിരാജ് പ്രൊഡക്ഷൻസ് എന്നീ ബാനറുകളില്‍ സുപ്രിയ മേനോനും മുകേഷ് ആർ മേത്തയും സി വി സാരഥിയും ചേർന്നാണ് ചിത്രം നിർമ്മിക്കുന്നത്. റോഷാക്ക്, ഇബിലീസ് എന്നീ ചിത്രങ്ങൾക്ക് ശേഷം സമീര്‍ അബ്ദുള്‍ ആണ് ഐ നോബഡിയുടെ രചന നിർവഹിക്കുന്നത്.
ഛായാഗ്രഹണം ദിനേശ് പുരുഷോത്തമൻ, ലൈൻ പ്രൊഡ്യൂസർ ഹാരിസ് ദേശം, പ്രൊഡക്ഷൻ ഡിസൈനർ അർഷാദ് നാക്കോത്ത്, മേക്കപ്പ് റോണക്സ് സേവിയർ, കോസ്റ്റ്യൂം ധന്യ ബാലകൃഷ്ണൻ, പ്രൊഡക്ഷൻ കൺട്രോളർ റിനി ദിവാകർ, സംഘട്ടന സംവിധാനം വാനിക്ക് ബെൻ & കലൈ കിംഗ്സ്റ്റൺ, സൗണ്ട് ഡിസൈനർ നിക്സൺ ജോർജ്, വി എഫ് എക്സ് ലവ കുശ, പ്രൊമോഷൻസ് പൊഫാക്ഷിയോ, ഡിജിറ്റൽ മാർക്കറ്റിംഗ് വിപിൻ കുമാർ.വി, സ്റ്റിൽസ് രോഹിത് കെ സുരേഷ്, ഡിസൈൻസ് യെല്ലോ ടൂത്ത്, വിതരണം ഹോം സ്ക്രീൻ എന്റർടെയ്ന്‍‍മെന്‍റ്.