‘എന്നെന്നും ആ സംവിധായകനോട് കടപ്പെട്ടിരിക്കുന്നു’; നദിയ മൊയ്തുവിന്റെ ആദ്യ ഇന്‍സ്റ്റഗ്രാം പോസ്റ്റ്
ഇന്‍സ്റ്റഗ്രാമില്‍ അക്കൗണ്ട് തുടങ്ങി നടി നദിയാ മൊയ്തു. ഫാസില്‍ സംവിധാനം ചെയ്ത നോക്കെത്താ ദൂരത്ത് കണ്ണും നട്ട് എന്ന ചിത്രത്തിലൂടെ വെള്ളിത്തിരയിലെത്തി നദിയ, സിനിമയുടെ ചിത്രീകരണത്തിനിടെ പകര്‍ത്തിയ ചിത്രമാണ് ആദ്യമായി ഇന്‍സ്റ്റഗ്രാമില്‍ പോസ്റ്റ് ചെയ്തത്. എത്ര സന്തോഷകരമായിരുന്നു തന്റെ ആദ്യ ചിത്രത്തിന്റെ വര്‍ക്കെന്ന് നദിയ ചിത്രം പങ്കുവെച്ച് കുറിച്ചു.
ബ്രില്യന്റ് ഡയറക്ടര്‍ ഫാസിലിനോട് എന്നെന്നും കടപ്പെട്ടിരിക്കുന്നു. ഈ വര്‍ഷങ്ങളില്‍ എല്ലാം തനിക്ക് പിന്തുണയും സ്‌നേഹവും നല്‍കിയ എല്ലാവരോടും ഒരുപാട് സ്‌നേഹമെന്നും നദിയ ഇന്‍സ്റ്റഗ്രാമില്‍ കുറിച്ചു.
1984ലായിരുന്നു ഫാസിലിന്റെ ചിത്രത്തിലൂടെ നദിയയുടെ സിനിമാ അരങ്ങേറ്റം. മലയാളത്തിലെ മികച്ച നടിക്കുള്ള ഫിലിം ഫെയര്‍ അവാര്‍ഡ് തന്റെ ആദ്യ ചിത്രത്തിലൂടെ നദിയ നേടിയിരുന്നു. ഇതിന്റെ തമിഴ് റിമേക്കായ പൂവേ പൂച്ചൂടവ ആയിരുന്നു ആദ്യ തമിഴ് ചിത്രം.