പ്രശസ്ത സംവിധായകൻ സംഗീത് ശിവൻ അന്തരിച്ചു. മുംബെെയിലെ സ്വകാര്യ ആശുപത്രിയിൽ ചികിത്സയിലായിരുന്നു. യോദ്ധ, നിർണയം, ഗാന്ധർവം എന്നീ ഹിറ്റ് ചിത്രങ്ങളുടെ സംവിധായകനാണ്. പ്രശസ്ത ഫോട്ടോഗ്രാഫറായ അച്ഛൻ ശിവന്റെ ഡോക്യുമെന്ററികളിലും മറ്റും ഭാഗമായാണ് സിനിമ രംഗത്തേക്ക് കടന്നുവന്നത്. 1990 ൽ പുറത്തിറങ്ങിയ വ്യൂഹം എന്ന ചിത്രത്തിലൂടെയാണ് സംവിധാന രംഗത്ത് അരങ്ങേറ്റം കുറിച്ചത്.
ഏ.ആർ റഹ്മാൻ ആദ്യമായി മലയാളത്തിൽ ഒരു സിനിമയ്ക്ക് സംഗീത സംവിധാനം നിർവഹിച്ചത് സംഗീത് ശിവന്റെ യോദ്ധ എന്ന ചിത്രത്തിന് വേണ്ടിയായിരുന്നു. ഹിന്ദിയിൽ എട്ടോളം സിനിമകൾ സംവിധാനം ചെയ്തിട്ടുണ്ട്. ഛായാഗ്രാഹകനും സംവിധായകനുമായ സന്തോഷ് ശിവൻ, സംവിധായകൻ സഞ്ജീവ് ശിവൻ എന്നിവർ സഹോദരങ്ങളാണ്.