സ്വര്‍ണ്ണക്കടത്ത് കേസും തിരുവനന്തപുരത്തെ ട്രിപ്പിള്‍ ലോക്ക് ഡൗണുമായി ബന്ധിപ്പിച്ച് നടി അഹാന കൃഷ്ണ ഇന്‍സ്റ്റഗ്രാമില്‍ പോസ്റ്റ് ചെയ്ത സ്‌റ്റോറി തെറ്റിദ്ധരിപ്പിക്കുന്നതെന്ന് വിമര്‍ശനം. കൊവിഡ് വ്യാപനം ഗുരുതര സ്ഥിതി സൃഷ്ടിച്ച തിരുവനന്തപുരം നഗത്തില്‍ സര്‍ക്കാര്‍ ട്രിപ്പിള്‍ ലോക്ക് ഡൗണ്‍ ഏര്‍പ്പെടുത്തിയതിനെ സ്വര്‍ണ്ണക്കടത്തുമായി ബന്ധിപ്പിച്ച് പ്രചരിപ്പിക്കുന്നതിലെ അപകടമാണ് വിമര്‍ശിക്കപ്പെടുന്നത്.

ജൂലൈ 8ന് സംസ്ഥാനത്ത് 301 കൊവിഡ് കേസുകളാണ് റിപ്പോര്‍ട്ട് ചെയ്തത്. തിരുവനന്തപുരത്ത് 64. സമൂഹ വ്യാപന ഭീഷണി നേരിടുന്ന പൂന്തുറ പൂര്‍ണമായും അടച്ചിടുകയും കമാന്‍ഡോ സംഘത്തെ വിന്യസിക്കുകയും ചെയ്തിരുന്നു. എറണാകുളത്തും സമ്പര്‍ക്ക വ്യാപനം സ്ഥിരീകരിച്ച കണ്ടെയ്ന്‍മെന്റ് സോണുകളില്‍ മുന്നറിയിപ്പില്ലാതെ ട്രിപ്പിള്‍ ലോക്ക് ഡൗണ്‍ പ്രഖ്യാപിക്കുമെന്ന് മന്ത്രി വി എസ് സുനില്‍കുമാര്‍ അറിയിച്ചിരുന്നു.

സ്വര്‍ണ്ണക്കടത്ത് കേസ് അട്ടിമറിക്കാനാണ് തിരുവനന്തപുരത്ത് ട്രിപ്പിള്‍ ലോക്ക് ഡൗണ്‍ എന്ന വ്യാജപ്രചരണം സാമൂഹ്യമാധ്യമങ്ങളില്‍ ഉണ്ടായിരുന്നു. ഇതിന് ബലം പകരുകയും ഗുരുതരമായ സ്ഥിതിവിശേഷത്തെ നിസാരവല്‍ക്കരിക്കുകയും ചെയ്യുന്നതാകും അഹാന കൃഷ്ണയുടെ പോസ്റ്റ് എന്ന് വിമര്‍ശിക്കപ്പെടുന്നുണ്ട്‌.