കൊവിഡ് പ്രതിരോധത്തിന്റെ ഭാഗമായി പ്രധാനമന്ത്രി നരേന്ദ്രമോദിയുടെ ലോക് ഡൗണ്‍ ഉത്തരവ് ലംഘിച്ച് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. പത്രസമ്മേളനം നടത്തുന്നതിനായി കോഴിക്കോട് നിന്നും തിരുവനന്തപുരത്തേക്ക് നടത്തിയ യാത്രയാണ് വിവാദമായിരിക്കുന്നത്. ചാരിറ്റി പ്രവര്‍ത്തനത്തിനായി സേവാ ഭാരതിയുടെ പേരില്‍ സംഘടിപ്പിച്ച പാസിലായിരുന്നു കെ സുരേന്ദ്രന്റെ യാത്രയെന്നാണ് സൂചന.

ഓരോരുത്തരും നില്‍ക്കുന്നിടത്ത് തന്നെ തുടരാനായിരുന്നു ലോക്ക് ഡൗണ്‍ പ്രഖ്യാപിക്കുമ്പോള്‍ പ്രധാനമന്ത്രി നരേന്ദ്രമോദി ആവശ്യപ്പെട്ടിരുന്നത്. ഈ സമയത്ത് കോഴിക്കോട്ടെ വീട്ടിലായിരുന്നു കെ സുരേന്ദ്രന്‍. ഇവിടെ നിന്നും തിരുവനന്തപുരത്തെത്തിയാണ് വാര്‍ത്താ സമ്മേളനം നടത്തിയത്.

പൊലീസിന്റെ പാസ് കിട്ടിയാല്‍ മാത്രമേ ഒരു ജില്ലയില്‍ നിന്നും മറ്റൊരു ജില്ലയിലേക്ക് യാത്ര ചെയ്യാന്‍ പറ്റുകയുള്ളു. ഡിജിപിയുടെ അനുമതിയോടെയാണ് യാത്ര നടത്തിയെന്നാണ് കെ സുരേന്ദ്രന്റെ വാദം. കൊവിഡ് ബാധിത പ്രദേശമായ കോഴിക്കോട് നിന്നുള്ള യാത്ര പൊലീസ് ഗൗരവത്തോടെയാണ് കാണുന്നത്.