ലെനിന്‍ കോഴിയെന്ന പരാമര്‍ശത്തിന് പിന്നാലെ മുസ്ലിം ലീഗ് നേതാവ് ഡോ.എം.കെ മുനീറിന്റെ മാര്‍ക്‌സിനെക്കുറിച്ചുള്ള പരാമര്‍ശവും വിവാദത്തില്‍.
'' മാര്‍ക്‌സിനെ പോലെ വൃത്തിയില്ലാത്ത ഒരു മനുഷ്യന്‍ ഈ ഭൂമിയില്‍ കാണില്ല. കുളിക്കില്ല, പല്ലുതേക്കില്ല, കുപ്പായം മാറ്റില്ല. ഭാര്യയും വീട്ടുജോലിക്കാരിയും ഒരേ സമയമാണ് ഗര്‍ഭിണിയായത്. ജോലിക്കാരിയുടെ മകന് അടുക്കളയിലൂടെ മാത്രമേ അകത്തു കയറാന്‍ കഴിയൂ. ആ കുട്ടിക്ക് മാര്‍ക്‌സിന്റെ അതേ ഛായയാണ്,'' എന്നായിരുന്നു മുനീറിന്റെ പരാമര്‍ശം. എം.എസ്.എഫ് സംസ്ഥാന ക്യാമ്പിലായിരുന്നു മുനീറിന്റെ പരാമര്‍ശം.
താന്‍ മുന്നേ ഇത് ഡി.വൈ.എഫ്.ഐ നേതാവ് സ്വരാജിനോട് പറഞ്ഞപ്പോള്‍ ആ പുസ്തകം കാണിച്ച് തരാന്‍ അദ്ദേഹം ആവശ്യപ്പെട്ടുവെന്നും മുനീര്‍ പറഞ്ഞിരുന്നു. പിന്നീട് പോള്‍ ജോണ്‍സണ്‍ എഴുതിയ ഇന്റലക്ച്വല്‍സില്‍ എന്ന പുസ്തകത്തിന്റെ കവര്‍ സ്‌ക്രീനില്‍ കാണിച്ച് ഇതാണ് ആ പുസ്തകമെന്നും മുനീര്‍ പറഞ്ഞു.
പരാമര്‍ശത്തിനെതിരെ വലിയ വിമര്‍ശനമാണ് സമൂഹ മാധ്യമങ്ങളില്‍ ഉയരുന്നത്. മുനീറിന്റെ ജെന്‍ഡര്‍ ന്യൂട്രാലിറ്റിയെ കുറിച്ചുള്ള പരാമര്‍ശവും പിന്നീട് ഇതില്‍ നല്‍കിയ വിശദീകരണവും വിവാദമായിരുന്നു.