ഏപ്രിലോടെ സീരിയലുകളും നിര്ത്തും, ചിത്രീകരിച്ച എപ്പിസോഡുകളില്ല
കൊവിഡ് പ്രതിരോധത്തിന്റെ ഭാഗമായി സിനിമാ-സീരിയല് നിര്മ്മാണം പൂര്ണമായും നിര്ത്തിവച്ചിരുന്നു. മാര്ച്ച് പകുതിയോടെയാണ് സീരിയല് നിര്മ്മാണം നിര്ത്തിയത്. രാജ്യം സമ്പൂര്ണ ലോക്ക് ഡൗണില് ആയ സാഹചര്യത്തില് മലയാളത്തിലും സീരിയലുകള് നിലക്കും. ഏപ്രില് പകുതിയോടെ പ്രധാന സീരിയലുകള് ഉള്പ്പെടെ താല്ക്കാലികമായി നിര്ത്തിവെക്കാനാണ് ചാനലുകളുടെ ആലോചന. തുടര്ചിത്രീകരണം പൂര്ത്തിയാക്കുന്ന മുറക്ക് മാത്രമായിരിക്കും ബാക്കി എപ്പിസോഡുകള് സംപ്രേഷണം ചെയ്യാനാവുക.
കൊവിഡ് 19 പശ്ചാത്തലത്തില് ഏഷ്യാനെറ്റ് ബിഗ് ബോസ്സ് റിയാലിറ്റി ഷോ അവസാനിപ്പിച്ചതിന് പിന്നാലെ വിനോദ ചാനലുകള് പ്രധാന റിയാലിറ്റി ഷോകളുടെയും സിറ്റ് കോമുകളുടെയും ഉള്പ്പെടെ ചിത്രീകരണം നിര്ത്തിവച്ചിരുന്നു. ലോക്ക് ഡൗണ് കാലയളവില് ജനപ്രിയ പരമ്പരകളുടെ പുനസംപ്രേഷണം ആണ് ചാനലുകള് ആലോചിക്കുന്നത്. വിഷു പ്രിമിയര് ചിത്രീകരണവും ഉപേക്ഷിക്കപ്പെട്ട സാഹചര്യത്തില് ജനപ്രിയ സിനിമകള് പുതിയ ബാന്ഡില് സംപ്രേഷണം ചെയ്യുന്ന കാര്യവും ചാനലുകളുടെ ആലോചനയില് ഉണ്ട്. ഇങ്ങനെ വന്നാല് മിക്ക ചാനലുകളും പ്രോഗ്രാമുകളുടെ സമയക്രമത്തില് മാറ്റം വരുത്തും.
മലയാളത്തില് ജനറല് എന്റര്ടെയിന്മെന്റ് ചാനലുകളിലെ പ്രൈം ടൈം സീരിയലുകള് ആണ് ബാര്ക്ക് റേറ്റിംഗില് ഉള്പ്പെടെ ഇതരപരിപാടികളെക്കാള് ബഹുദൂരം മുന്നിലെത്താറുള്ളത്. സീരിയലുകള്ക്ക് പുറമേ കോമഡി ഷോകളും പുതുതായി ചിത്രീകരിക്കുന്നില്ല. എല്ലാ ചാനലുകളും പുനസംപ്രേഷണം തന്നെയാണ് ഈ കാലയളവില് ആലോചിക്കുന്നത്. വിനോദ ചാനലുകള്ക്ക്് പുറമേ ഒടിടി പ്ലാറ്റ്ഫോമുകളും പുതിയ കണ്ടന്റുകളുടെ കാര്യത്തില് പ്രതിസന്ധി നേരിടുന്നുണ്ട്.