നടിയെ അക്രമിച്ച കേസില്‍ നടന്‍ ദിലീപിന് തിരിച്ചടി. തുടരന്വേഷണം തടയണമെന്ന ദിലീപിന്റെ ഹര്‍ജി ഹൈക്കോടതി തള്ളി. ക്രൈംബ്രാഞ്ച് ആവശ്യം പരിഗണിച്ചാണ് ഹൈക്കോടതിയുടെ ഉത്തരവ്. അടുത്ത മാസം 15നകം തുടരന്വേഷണം പൂര്‍ത്തിയാക്കണമെന്ന് കോടതി നിര്‍ദേശിച്ചു.
നടിയെ ആക്രമിച്ച കേസിലെ വിചാരണ നീട്ടികൊണ്ട് പോകാനാണ് തുടരന്വേഷണം നടത്തുന്നതെന്നായിരുന്നു ദിലീപിന്റെ വാദം. വിചാരണ പെട്ടെന്ന് പൂര്‍ത്തിയാക്കാന്‍ വിചാരണക്കോടതിക്ക് നിര്‍ദേശം നല്‍കണമെന്നുമായിരുന്നു ദിലീപ് ആവശ്യപ്പെട്ടത്.
തുടരന്വേഷണത്തിന് മൂന്ന് മാസം വേണമെന്നായിരുന്നു അന്വേഷണ സംഘം കോടതിയില്‍ ആവശ്യപ്പെട്ടത്. സമയം നീട്ടി നല്‍കരുതെന്ന് ദിലീപ് ആവര്‍ത്തിച്ച് ആവശ്യപ്പെട്ടു. തനിക്കെതിരെ വ്യാജ തെളിവുകള്‍ ചമയ്ക്കുകയാണെന്നതായിരുന്നു ദിലീപിന്റെ ആരോപണം.
തുടരന്വേഷണം മാര്‍ച്ച് ഒന്നിനകം പൂര്‍ത്തിയാക്കി റിപ്പോര്‍ട്ട് സമര്‍പ്പിക്കണമെന്ന് കഴിഞ്ഞ ദിവസം ഹൈക്കോടതി പറഞ്ഞിരുന്നു. ഡിജിറ്റല്‍ തെളിവുകള്‍ പരിശോധിക്കാനുണ്ടെന്ന് പ്രോസിക്യൂഷന്‍ വാദിച്ചിരുന്നു. ശബ്ദപരിശോധന പൂര്‍ത്തിയാക്കാനുണ്ട്.
നടി കേസില്‍ കക്ഷി ചേര്‍ന്നിരുന്നു. തുടരന്വേഷണം തടയരുതെന്ന് നടി ഹൈക്കോടതിയില്‍ ആവശ്യപ്പെട്ടിരുന്നു. പ്രതിയുടെ അടുത്ത സുഹൃത്താണ് വെളിപ്പെടുത്തില്‍ നടത്തിയിരിക്കുന്നത്. കേസിലെ എല്ലാ പ്രതികളെയും പുറത്ത് കൊണ്ടുവരണമെന്നും നടി ആവശ്യപ്പെട്ടിരുന്നു.
