സുരേഷേട്ടനൊപ്പം വീണ്ടും സിനിമ ചെയ്യാനാവുന്നതിന്റെ ആഹ്ലാദത്തിലാണെന്ന് ബിജു മേനോന്‍
സുരേഷ് ഗോപിയുടെ മാസ് ആക്ഷന്‍ സിനിമകളില്‍ ശക്തമായ സാന്നിധ്യമായി ഉണ്ടായിരുന്ന നടനാണ് ബിജു മേനോന്‍. സുരേഷ് ഗോപിയുടെ 250ാം ചിത്രമായി പ്രഖ്യാപിച്ച ഒറ്റക്കൊമ്പനില്‍ രണ്ടാമത്തെ പ്രധാന താരമായി അണിയറക്കാര്‍ പ്രഖ്യാപിച്ചത് ബിജു മേനോനെയാണ്. 11 വര്‍ഷത്തിന് ശേഷമാണ് സുരേഷ് ഗോപിയും ബിജു മേനോനും ഒന്നിച്ചെത്തുന്നത്. സിനിമക്ക് പുറത്ത് അടുത്ത സുഹൃത്തുക്കള്‍ കൂടിയാണ് ഇരുവരും.
വില്ലന്‍ റോളിലാണ് ബിജു മേനോന്‍ എത്തുകയെന്ന് പ്രചരണമുണ്ടായെങ്കിലും അണിയറ പ്രവര്‍ത്തകര്‍ ഇത് നിഷേധിച്ചിട്ടുണ്ട്. സുരേഷ് ഗോപിയുടെ കുറുവച്ചനൊപ്പം നില്‍ക്കുന്ന കഥാപാത്രമാണ് ബിജു മേനോന്റെ നോബിള്‍.
ജയരാജ് ചിത്രം കളിയാട്ടം, ജോഷിയുടെ പത്രം, എഫ്.ഐ.ആര്‍, രണ്ടാം ഭാവം എന്നീ സിനിമകളില്‍ ബിജു മേനോന്‍ സുരേഷ് ഗോപിക്കൊപ്പം നിര്‍ണായക റോളുകളിലെത്തിയിരുന്നു. 2010ല്‍ രാമരാവണന്‍ എന്ന ചിത്രത്തിനായാണ് ഇരുവരും അവസാനമായി ഒരുമിച്ചത്. സുരേഷേട്ടനൊപ്പം വീണ്ടും സിനിമ ചെയ്യാനാവുന്നതിന്റെ ആഹ്ലാദത്തിലാണെന്ന് ബിജു മേനോന്‍ പറയുന്നു.
സിഐഎ, അണ്ടര്‍ വേള്‍ഡ് എന്നീ സിനിമകള്‍ക്ക് ശേഷം ഷിബിന്‍ ഫ്രാന്‍സിസ് തിരക്കഥയെഴുതുന്ന ഒറ്റക്കൊമ്പന് സംവിധാനം ചെയ്യുന്നത് മാത്യൂസ് തോമസാണ്. ഷാജി കുമാറാണ് ക്യാമറ. അര്‍ജുന്‍ റെഡ്ഡി, കണ്ണും കണ്ണും കൊള്ളയടിത്താല്‍ എന്നീ സിനിമകള്‍ക്ക് സംഗീതമൊരുക്കിയ ഹര്‍ഷവര്‍ധന്‍ ആണ് സംഗീതം. 25 കോടിക്ക് മുകളില്‍ മുതല്‍ മുടക്കിലാണ് സിനിമ.
മുകേഷ്, വിജയരാഘവന്‍, രണ്‍ജി പണിക്കര്‍, ജോണി ആന്റണി, സുധി കോപ്പ, കെ.പി.എ.സി ലളിത എന്നിവരും ചിത്രത്തിലുണ്ട്. വില്ലനും നായികയും ബോളിവുഡില്‍ നിന്നായിരിക്കും. ടോമിച്ചന്‍ മുളകുപ്പാടമാണ് നിര്‍മ്മാണം.
