ജെയിംസ് ബോണ്ട് സീരിസിലെ 25-ാമത് ചിത്രമായ 'നോ ടൈം ടു ഡൈ' ഈ വർഷം റിലീസിനില്ല. ഏപ്രിൽ മാസം പ്രഖ്യാപിച്ചിരുന്ന ആദ്യ റിലീസ് 2020 നവംബർ 12ലേയ്ക്ക് മാറ്റിയിരുന്നു. എന്നാൽ കൊവിഡ് കണക്കുകൾ പെരുകുന്ന സാഹചര്യത്തിൽ റീലീസ് തീയതി വീണ്ടും മാറ്റിവെയ്ക്കുന്നതായാണ് പുതിയ റിപ്പോർട്ടുകൾ. 2021 ഏപ്രിൽ രണ്ടാണ് പുതുക്കിയ തീയതി.
കാരി ജോജി ഫുക്വാങ്കയാണ് ചിത്രത്തിന്റെ സംവിധായകൻ. ലോകപ്രശസ്ത പ്രൊഡക്ഷൻ കമ്പനിയായ എംജിഎം ആണ് നിർമ്മാണം. 250 മില്യൻ ഡോളറാണ് ചിത്രത്തിന്റെ മുതൽമുടക്ക്. എംഐ സിക്‌സ് ഉദ്യോഗസ്ഥനായ ജെയിംസ് ബോണ്ടായി ഡാനിയൽ ക്രെയ്ഗ് വേഷമിടുന്നു.
റിലീസ് മാറ്റിയ വിവരം എംജിഎം, യൂണിവേഴ്‌സൽ ആന്റ് ബോണ്ട് പ്രൊഡ്യൂസേഴ്‌സിന്റെ ഒഫീഷ്യൽ ട്വിറ്റർ അക്കൗണ്ടിലൂടെ അറിയിച്ചു. ചൈന, ജപ്പാൻ, ദക്ഷിണ കൊറിയ എന്നിവിടങ്ങളിലായി തീരുമാനിച്ചിരുന്ന ചിത്രത്തിന്റെ പ്രൊമോഷൻ പരിപാടികളും കൊവിഡ് നിയന്ത്രണങ്ങളെ തുടർന്ന് ഉപേക്ഷിച്ചിരുന്നു.
