സ്ത്രീകൾക്കെതിരെയുളള സൈബർ ആക്രമണങ്ങൾക്കെതിരെ വുമൺ ഇൻ സിനിമ കളക്റ്റീവിന്റെ നേതൃത്വത്തിൽ നടക്കുന്ന REFUSE The Abuse – സൈബർ ഇടം, ഞങ്ങളുടെയും ഇടം! കാമ്പയിനിൽ അനശ്വര രാജനും. ഇന്സ്റ്റഗ്രാമിൽ പങ്കുവെച്ച ചിത്രത്തിന്റെ പേരില് സൈബര് ആക്രമണം നേരിട്ട അനശ്വര സോഷ്യൽ മീഡിയയിലൂടെ നൽകിയ മറുപടി 'വീ ഹാവ് ലെഗ്സ്' എന്ന വലിയ മൂവ്മെന്റിന് തുടക്കമിട്ടിരുന്നു. സോഷ്യല്മീഡിയകളിലൂടെ നടക്കുന്ന ആക്രമണങ്ങള്ക്ക് പ്രതിരോധം സൃഷ്ടിക്കാന് സോഷ്യല്മീഡിയ തന്നെ തെരഞ്ഞെടുക്കാവുന്നതാണെന്നും അതിനാല് ഇത്തരം ക്യാമ്പയിനുകള് കൂടുതലായി പ്രോത്സാഹിപ്പിക്കപ്പെടേണ്ടതുണ്ടെന്നും സംഘടന വ്യക്തമാക്കുന്നു. മറ്റൊരാളുടെ സ്വകാര്യതയിൽ കടന്നുകയറി അവരെ കീറിമുറിച്ച് വേദനിപ്പിക്കുന്ന സംമ്പ്രദായം അതിക്രമിച്ചിരിക്കുന്നു എന്ന് കാമ്പയിന്റെ ഭാഗമായി അനശ്വര പങ്കുവെച്ച വീഡിയോയിൽ പറയുന്നു.
ബഹുമാനിക്കാൻ പഠിക്കണം, അനശ്വരയുടെ വാക്കുകൾ
'ഞാൻ പങ്കുവെയ്ക്കുന്ന എന്റെ സന്തോഷങ്ങളുടെ താഴെ കാണുന്ന പല അസഭ്യവർഷങ്ങളും വായിക്കുമ്പോൾ ഏതൊരാളും ചിന്തിച്ചുപോകും നമ്മൾ ഇരുപത്തൊന്നാം നൂറ്റാണ്ടിലല്ലേ ഇനിയും മാറാറായില്ലേ എന്ന്. അതെ, മറ്റൊരാളുടെ സ്വകാര്യതയിൽ കടന്നുകയറി അവരെ കീറിമുറിച്ച് വേദനിപ്പിക്കുന്ന സംമ്പ്രദായം ഒരുപാട് അതിക്രമിച്ചു കഴിഞ്ഞിരിക്കുന്നു. നാലു ചുവരുകൾക്കുള്ളിലിരുന്ന് തോന്നിയതൊക്കെ വലിച്ചുവാരി എഴുതുമ്പോൾ സൂക്ഷിക്കണം, അത് നാലു കേടിയിലേറെ ജനങ്ങൾ കാണുന്നുണ്ടെന്ന്. പഠിക്കണം, ബഹുമാനിക്കാൻ.'
സമൂഹമാധ്യമങ്ങളിലും സൈബര് ഇടങ്ങളിലും സ്ത്രീകള്ക്കു നേരെയുണ്ടാകുന്ന ആക്രമണങ്ങള്ക്കെതിരെ പ്രതികരിക്കേണ്ടതിന്റെ ആവശ്യകത ഓര്മിപ്പിക്കുകയാണ് ഡബ്ല്യൂ.സി.സി. അന്ന ബെൻ, സാനിയ ഇയ്യപ്പൻ, നിമിഷ സജയൻ, രഞ്ജിനി ഹരിദാസ്, മഞ്ജുവാര്യർ, പൂർണിമ ഇന്ദ്രജിത്, സൈനോര ഫിലിപ്, കനി കുസൃതി, ഗംഗ ജി നായർ, നവ്യ നായർ, പാർവ്വതി തിരുവോത്ത്, രഞ്ജു രഞ്ജിമാർ, ശീതൾ ശ്യാം തുടങ്ങി പ്രമുഖരായ മുപ്പതിലധികം സ്ത്രീകൾ ഇതുവരെ കാമ്പയിന്റെ ഭാഗമായിട്ടുണ്ട്.