Coronavirus

‘അമാവാസിയില്‍ വൈറസ് പരമാവധി കരുത്താര്‍ജിക്കും, കയ്യടിയും ശംഖൂതലും അവയെ നശിപ്പിക്കും’; അശാസ്ത്രീയ വാദവുമായി ബച്ചന്‍ 

കൊവിഡ് വൈറസ് ബാധ സംബന്ധിച്ച് അശാസ്ത്രീയ വാദങ്ങള്‍ ഏറ്റുപിടിച്ച് ബോളിവുഡ് നടന്‍ അമിതാഭ് ബച്ചന്‍. ട്വീറ്റിലൂടെയാണ് ബിഗ്ബി അബദ്ധജടിലമായ പ്രസ്താവനയുമായി രംഗത്തെത്തിയത്. തിങ്കളാഴ്ച ഉച്ചയോടെയുള്ള അദ്ദേഹത്തിന്റെ ട്വീറ്റ് ഇങ്ങനെ.

മാര്‍ച്ച് 22 അമാവാസിയാണ്, മാസത്തില്‍ ഏറ്റവും ഇരുട്ടുള്ള ദിനം, വൈറസ്, ബാക്ടീരിയ, ദുഷ്ടശക്തികള്‍ എന്നിവ ഏറ്റവും കരുത്താര്‍ജിക്കുന്ന ദിവസം. കയ്യടിക്കുന്നതും ശംഖനാദം മുഴക്കുന്നതും വൈറസിന്റെ ക്ഷമത കുറയ്ക്കുകയോ അവയെ നശിപ്പിക്കുകയോ ചെയ്യും . ചന്ദ്രന്‍ രേവതി നക്ഷത്രത്തിലേക്കാണ് അടുക്കുന്നത്. കയ്യടികള്‍ രക്തചംക്രമണത്തിന്റെ തോത് വര്‍ധിപ്പിക്കും.

Also Read: എന്താണ് ആരോഗ്യവകുപ്പിന്റെ പ്ലാന്‍ എ,ബി,സി ? മന്ത്രി കെകെ ശൈലജ പറയുന്നു 

തീര്‍ത്തും തെറ്റായ വാദങ്ങളാണ് അമിതാഭ് ബച്ചനില്‍ നിന്നുണ്ടായത്. മാര്‍ച്ച് 22 നല്ല മാര്‍ച്ച് 24 നാണ് അമാവാസി. കൂടാതെ ഈ ദിവസം വൈറസുകള്‍ കരുത്താര്‍ജിക്കുമെന്നത് ശാസ്ത്രീയ അടിത്തറയില്ലാത്ത വാദമാണ്. കൂടാതെ കൈമുട്ടിയാല്‍ കൊറോണ വൈറസിനെ നശിപ്പിക്കാനോ അതിന്റെ വ്യാപനം തടയാനോ സാധിക്കില്ലെന്ന് ആരോഗ്യവിദഗ്ധര്‍ വ്യക്തമാക്കിയിട്ടുണ്ട്. പോരാത്തതിന് പബ്ലിക് ഇന്‍ഫര്‍മേഷന്‍ ബ്യൂറോയുടെ ഫാക്ട് ചെക്കിംഗ് വിഭാഗം, ജനതാ കര്‍ഫ്യൂ ആചരിച്ച ഞായറാഴ്ച തന്നെ അത് വ്യാജപ്രചരണമാണെന്ന് വ്യക്തമാക്കിയിട്ടുണ്ട്. ജനരക്ഷയ്ക്കായി അഹോരാത്രം കഷ്ടപ്പെടുന്ന ആരോഗ്യ പ്രവര്‍ത്തകര്‍ക്ക് നന്ദിയറിയിക്കാനാണ് കൈ മുട്ടലെന്നാണ് പിഐബി വിശദീകരിച്ചത്.

Also Read: കൊവിഡ് 19: യൂറോപ്പിന്റെ മരുന്ന് പരീക്ഷണത്തില്‍ പ്രതീക്ഷയര്‍പ്പിച്ച് ലോകം, പ്രയോഗിക്കുന്നത് രോഗബാധിതരായ 3200 പേരില്‍

ഇതൊന്നും മനസ്സിലാക്കാതെയാണ് വന്‍ പിന്‍ഗാമി സമൂഹമുള്ള ബച്ചന്‍ ട്വിറ്ററിലൂടെ അശാസ്ത്രീയ വാദങ്ങള്‍ ഏറ്റുപിടിച്ചത്. പ്രധാനമന്ത്രി ആഹ്വാനം ചെയ്ത ജനത കര്‍ഫ്യൂവിന് ഐക്യദാര്‍ഢ്യം പ്രഖ്യാപിച്ചുകൊണ്ടുള്ള കൈമുട്ടലില്‍ കുടുംബസമേതം അഭിഷേകിനും ഐശ്വര്യ റായിക്കുമെല്ലാമൊപ്പം കണ്ണി ചേര്‍ന്നതിന് പിന്നാലെയാണ് അദ്ദേഹത്തിന്റെ ട്വീറ്റ് വന്നതും.

ദ ക്യു പ്രോഗ്രാമുകള്‍ക്കും വീഡിയോകള്‍ക്കുമായി ഞങ്ങളുടെ യൂട്യൂബ് ചാനല്‍ ഈ ലിങ്കില്‍ സബ്‌സ്‌ക്രൈബ് ചെയ്യാം.