ടോം ഹാങ്ക്‌സിനും റിറ്റ വില്‍സനും കൊവിഡ് 19, ഐസലോഷനില്‍ തുടരുമെന്ന് ട്വീറ്റ്
മുന്‍നിര ഹോളിവുഡ് താരം ടോം ഹാങ്ക്‌സിനും, നടിയും ഭാര്യയുമായ റിറ്റ വില്‍സണും കൊറോണാ വൈറസ് ബാധ സ്ഥിരീകരിച്ചു. പരിശോധനാ ഫലങ്ങള്‍ പോസിറ്റീവായിരുന്നുവെന്നും ആരോഗ്യവകുപ്പിന്റെ നിര്‍ദേശങ്ങള്‍ പാലിച്ച് ഐസലോഷനില്‍ തുടരുമെന്നും ടോം ഹാങ്ക്‌സ് ട്വീറ്റ് ചെയ്തു. ഇരുവരും ഓസ്‌ട്രേലിയയിലാണ്.
ടോം ഹാങ്ക്‌സിന്റെ ട്വീറ്റ്
ഞാനും റിറ്റയും ഓസ്‌ട്രേലിയയിലാണ്. ശരീരവേദനയും ജലദോഷവും ഉണ്ടായിരുന്നു. റിറ്റയ്ക്ക് ജലദോഷമുണ്ടായിരുന്നു. കോറോണാ വൈറസ് പരിശോധനയില്‍ ഫലം പൊസിറ്റീവ് ആയിരുന്നു. ആരോഗ്യ വകുപ്പിന്റെ നിര്‍ദേശങ്ങള്‍ ഞങ്ങള്‍ കര്‍ശനമായി പാലിക്കുന്നുണ്ട്. ഡോക്ടര്‍മാരുടെ നിരീക്ഷണത്തിലാണ്. പൊതുജനാരോഗ്യവും സുരക്ഷയും ഉള്‍ക്കൊണ്ട് ഞങ്ങള്‍ ഐസൊലേഷനിലാണ്. എല്ലാവരും ജാഗ്രത തുടരണം.
എല്‍വിസ് പ്രിസ്ലിയുടെ ബയോപിക്ക് ചിത്രീകരണത്തിനായാണ് ഹാങ്ക്‌സ് ഓസ്‌ട്രേലിയയില്‍ എത്തിയിരുന്നത്. വാര്‍ണര്‍ ബ്രദേഴ്‌സാണ് ലോകപ്രശസ്ത ഗായകന്റെ ജീവചരിത്രം നിര്‍മ്മിക്കുന്നത. ടോം ഹാങ്ക്‌സിന്റെ പേര് പരാമര്‍ശിക്കാതെ ഗോള്‍ഡ് കോസ്റ്റില്‍ ചിത്രീകരണം പുരോഗമിക്കുന്ന സിനിമയിലെ ടീമംഗങ്ങളില്‍ ഒരാള്‍ക്ക് കോവിഡ് 19 ബാധ സ്ഥിരീകരിച്ചതായി അറിയിച്ചിരുന്നു.
