ഒക്ടോബര് മാസം മുതല് കെഎസ്ആര്ടിസി ബസുകളില് ടിക്കറ്റ് നിരക്ക് കുറക്കുമെന്ന് മന്ത്രി ആന്റണി രാജു. ഇപ്പോഴത്തെ നിരക്കില് നിന്ന് കൊവിഡിന് മുമ്പുണ്ടായിരുന്ന നിരക്കിലേക്ക് ടിക്കറ്റ് നിരക്ക് കൊണ്ടുവരും. ബസ് ചാര്ജ് വര്ധിപ്പിക്കണമെന്ന ജസ്റ്റിസ് രാമചന്ദ്രന് കമ്മീഷന്റെ ശുപാര്ശ, സര്ക്കാര് ചര്ച്ച ചെയ്യുമെന്നും ഗതാഗതമന്ത്രി അറിയിച്ചു.
ലോ ഫ്ളോര്-വോള്വോ ബസുകളില് സൈക്കിളും ഇലക്ട്രിക് സ്കൂട്ടറുകളും കൊണ്ടുപോകാന് അനുമതി നല്കുമെന്നും മന്ത്രി. ഒരു നിശ്ചിത തുക ഈടാക്കിയാകും ഇരുചക്രവാഹനങ്ങള് കൊണ്ടുപോകാന് അനുവദിക്കുക. ദീര്ഘദൂര യാത്രക്കാരുടെ ആവശ്യം പരിഗണിച്ചാണ് നടപടി.
നവംബര് ഒന്നു മുതല് ഇതിനുള്ള സൗകര്യം ഒരുക്കും. അന്തരീക്ഷമലിനീകരണമില്ലാത്ത ആരോഗ്യപ്രദമായ യാത്രക്ക് പ്രേരിപ്പിക്കുക എന്ന നയത്തിന്റെ ഭാഗമായാണ് ഈ പദ്ധതി നടപ്പിലാക്കുന്നത്. ലോകമെങ്ങും സൈക്കിള് സഞ്ചാരം പ്രോത്സാഹിപ്പിക്കുന്ന ഈ കാലഘട്ടത്തില് കേരളവും അതിനൊപ്പമുണ്ട് എന്ന സന്ദേശമാണ് ഇതിലൂടെ നല്കുന്നതെന്നും മന്ത്രി കൂട്ടിച്ചേര്ത്തു.