രാജ്യത്ത് തുടര്‍ച്ചയായ 16-ാം ദിവസവും ഇന്ധനവില കൂട്ടി. പെട്രോളിന് 33 പൈസയും ഡീസലിന് 55 പൈസയുമാണ് വര്‍ധിപ്പിച്ചത്. ഇതോടെ വില വര്‍ധന എട്ട് രൂപയിലേറെയായി. തിരുവനന്തപുരത്ത് പെട്രോള്‍ ലിറ്ററിന് 81 രൂപ കടന്നു. ഡീസല്‍ ലിറ്ററിന് 76 രൂപ 12 പൈസയും നല്‍കണം. കൊച്ചിയില്‍ പെട്രോള്‍ ലിറ്ററിന് 79.74 രൂപയും, ഡീസലിന് 74.64 രൂപയുമാണ്.
രണ്ടാഴ്ചയ്ക്കിടെ പെട്രോളിന് 8.33 രൂപയും ഡീസലിന് 8.98 രൂപയുമാണ് കൂട്ടിയത്. ജൂണ്‍ ഏഴ് മുതലാണ് ഇന്ധന വില ഉയരാന്‍ തുടങ്ങിയത്. ആഗോള വിപണിയില്‍ അസംസ്‌കൃത എണ്ണ വില ഇടിയുമ്പോഴാണ് ഇന്ത്യയില്‍ വില ഉരുന്നത്. അന്താരാഷ്ട്ര വിപണിയില്‍ ബാരലിന് 90 ഡോളറായിരുന്നു നിരക്കെങ്കില്‍ നിലവില്‍ ബ്രെന്റ് ക്രൂഡിന് ബാരലിന് 45 ഡോളറില്‍ താളെയാണ് വില.
ലോക്ക് ഡൗണ്‍ മൂലം 82 ദിവസത്തോളം മാറ്റമില്ലാതെ തുടര്‍ന്ന ഇന്ധനവിലയാണ് ജൂണ്‍ ഏഴ് മുതല്‍ വര്‍ധിപ്പിക്കാന്‍ ആരംഭിച്ചത്. കേന്ദ്രസര്‍ക്കാരും ചില സംസ്ഥാന സര്‍ക്കാരുകളും നികുതി നിരക്കില്‍ വരുത്തിയ വര്‍ധനവും രാജ്യത്തെ പെട്രോളിയം കമ്പനികള്‍ നഷ്ടം നികത്തല്‍ എന്ന പേരില്‍ ഉയര്‍ത്തുന്ന വില്‍പ്പന വിലയുമാണ് ഇന്ധന വില ഉയരാനുള്ള പ്രധാന കാരണങ്ങള്‍.
